Ymgynghoriad ar Gynllun Blynyddol Drafft yr Awdurdod Cystadleuaeth a Marchnadoedd 2026 i 2027

Mae'r Awdurdod Cystadleuaeth a Marchnadoedd (CMA) yn ymgynghori ar ei Gynllun Blynyddol drafft ar gyfer 2026 i 2027.

Gwybodaeth am yr ymgynghoriad hwn (cefndir yr ymgynghoriad)

Y Cynllun Blynyddol hwn yw'r cynllun gweithredu manwl cyntaf o dan ein Strategaeth newydd ar gyfer 2026-2029. Roedd y Strategaeth yn nodi ein pwrpas o hyrwyddo cystadleuaeth a diogelu defnyddwyr, gyda nod terfynol clir mewn golwg: sef sbarduno twf economaidd a gwella ffyniant aelwydydd.

Mae ein Cynllun Blynyddol drafft yn nodi ein blaenoriaethau blynyddol a newidiadau rydym yn eu gwneud i'r ffordd rydym yn gweithio ar gyfer pob un o'n swyddogaethau. Mae'r rhain yn adlewyrchu'r pum amcan craidd yn ein Strategaeth, a'r canlyniadau y byddwn yn cyfrannu atynt er lles economi, dinasyddion a busnesau'r DU..

Rydym eisiau clywed gennych

Rydym yn croesawu barn rhanddeiliaid a phartïon sydd â buddiant, ac rydym yn gofyn am farn pobl ar y cwestiynau canlynol:

• Ydych chi'n cytuno â blaenoriaethau arfaethedig yr Awdurdod Cystadleuaeth a Marchnadoedd ar gyfer y flwyddyn i ddod?
• Sut gall yr Awdurdod Cystadleuaeth a Marchnadoedd ymgysylltu â'n rhanddeiliaid yn effeithiol yn ystod y flwyddyn i ddod?
• Oes gennych chi unrhyw sylwadau eraill ar Gynllun Blynyddol drafft yr Awdurdod Cystadleuaeth a Marchnadoedd?

Sut mae ymateb

Anfonwch eich ymateb dros e-bost i annualplan2026@cma.gov.uk

Eich data personol

Byddwn yn prosesu unrhyw ddata personol a roddwch yn unol â deddfwriaeth diogelu data. Dim ond at ddibenion ein gwaith y byddwn yn cadw ac yn defnyddio eich data personol (i sicrhau ein bod yn ystyried eich ymateb). Byddwn wedyn yn ei ddileu'n ddiogel. Ni fyddwn yn rhannu eich data personol ag unrhyw drydydd parti. I gael rhagor o wybodaeth am sut mae'r Awdurdod Cystadleuaeth a Marchnadoedd yn prosesu data personol, darllenwch ein Hysbysiad Preifatrwydd (dolen allanol).

Byddwn yn crynhoi'r holl ymatebion ac yn cyhoeddi crynodeb o'r ymatebion a ddaeth i law. Bydd y crynodeb yn cynnwys rhestr o sefydliadau a oedd wedi ymateb, ond ni fydd yn cynnwys enwau pobl, cyfeiriadau na manylion cyswllt eraill. Cyn cyhoeddi gwybodaeth, byddwn yn ystyried unrhyw gyfyngiadau a osodir arnom gan y gyfraith (er enghraifft, ynghylch gwybodaeth gyfrinachol). Os ydych o'r farn bod eich ymateb yn cynnwys gwybodaeth sy'n fasnachol sensitif neu'n gyfrinachol am ryw reswm arall, nodwch hynny, gan nodi ei bod yn fasnachol sensitif neu'n gyfrinachol ac egluro pam. I gael rhagor o wybodaeth, ewch i Tryloywder a Datgelu: Datganiad o bolisi a dull gweithredu’r Awdurdod Cystadleuaeth a Marchnadoedd (dolen allanol).

Oni bai fod eithriad yn berthnasol, mae'n bosibl y byddwn yn datgelu'r ffaith eich bod wedi darparu gwybodaeth i ni, a'r wybodaeth rydych chi wedi'i darparu, yn unol â'n rhwymedigaethau o dan Ddeddf Rhyddid Gwybodaeth 2000.